عَزّْ العْلَامْ (زجل باللهجة المغربية)

طُوبْ الحْجَارْ كُونْ كانْ يَتْكَلّمْ
اِيسُوسْ اغْبَارُو دَامْعَة بَالدَّمّْ
يَرْدَمْ الحْيُوطْ اعْلَى اللِّي جَارُوا
يَخْسَفْ الوْطَا بَرْبَابْ الظُّلْمْ
يَبْرَزْ بَسْيَافُو يَدْمِي الاَشْرارْ
يَرْمِي بَحْصَاتُو يَكْوِي يَرْجَمْ
يَغْرَزْ بَوْتَادُو فَنْحُورْ الْعَارْ
يَخْنَقْ العْدَا بَنْيَابْ السَّمّْ
يَنْدَبْ احْوَالُو شَهْدَاتْ النْدَالَة
يَرْوِي مَصْدُومْ كِيفَاشْ يَكْتَمْ
كِيفَاشْ الْعِلْمْ يَضْرَبْ بَجْهَالَة
كِيفَاشْ الْحَقّْ يَغْصَبْ بَقْلَمْ
كِيفَاشْ النُّورْ يَتْرَشّْ بَرْمَادُو
كِيفَاشْ الصُّوتْ مَالُو امْكَمَّمْ
كِيفَاشْ الْجَهْلْ اِيطُولْ اسْيَادُو
يَرْشَݣْ لَمَّاسْ بَالغْدَرْ يَحْكَمْ
يَعْفَسْ بَنْجَاسُو يَلَطَّخْ الاَطْهَارْ
يَلْقِي بَرْجَاسُو يَجْهَرْ بَالْجُرْمْ
مَسْلُوبْ اذْلِيلْ مَالُو قِيمَة
يَرْضَى بَلْجَامْ اٍيجُرُّو يَأْثَمْ
يَأْذِي الاَشْرَافْ يَخْزِي فَعْلُو
اِيحَامِي جَفَّافْ ابْلَا مَا يَحْشَمْ
يَنْسَى نَكَّارْ اعْلَى مَنْ يَعْلُو
اعْلَى اللِّي سَادُوا بَنْوَارْ الْعِلْمْ
اعْلَى اللِّي بِيهِمْ الاَوْطَانْ اتْعَالَى
اعْلَى اللِّي ابْلَاهُمْ تَهْوِي الݣْدَمْ
اعْلَى اللِّي بِيهِمْ يَعْلُو المْقَامْ
اعْلَى اللِّي شَدُّوا بَرْبَاطْ الْعَزْمْ
اعْلَى اللِّي ضَاݣُوا مَنْ حَرّْ الفْيَافِي
اعْلَى اللِّي صَدُّوا البْلَا بَالْحِلْمْ
اعْلَى اللِّي قَادُوا مَرْكَبْ النْجَا
اعْلَى اللِّي كَسْبُوا ارْهَانْ السِّلْمْ
اعْلَى اللِّي رَامُوا مِيزَانْ الْعَدْلْ
كِيفَاشْ اللِّي ائْذَاهُمْ يَسْلَمْ
مَهْمَا الْحَقّْ اِيبَانْ مَقْبُورْ
مَهْمَا اللِّيلْ اِيطُولْ وِيظَلَّمْ
مَهْمَا الشَّرّْ يَطْغَى وِيجُورْ
مَهْمَا الْحَالْ خَانَقْ اُو امْغَمَّمْ
مَهْمَا الْحَاقَدْ يَسْعَى بَالزُّورْ
مَهْمَا اذْنَابُو ايْمَدُّوهْ بَالدَّعْمْ
مَهْمَا اتْعَانِي فَالْمَحْنَة مَقْهُورْ
مَهْمَا اتْجَرَّعْ امْرَارْ الْعَلْقَمْ
لاَزَمْ مَا الْبَاطَلْ اِيخُورْ
وَ اسْوَارُو فَالْحِينْ اتْهَدَّمْ
لاَزَمْ مَا الاَيَّامْ ادُّورْ
اعْلَى اللِّي غَرُّوهْ اكْتَافُو وَ انْقَمْ
لاَزَمْ مَا الْغُمَّة مَا اتْزُولْ
وَ الْغَاشَمْ يَنْهَارْ اوْ يَنْدَمْ
لاَزَمْ مَا يَجْنِي الْمَحْݣُورْ
بَنْضَالُو أَمْجَادْ اوْ يَغْنَمْ
لاَزَمْ مَا ايْخَلَّدْ مَنْصُورْ
لَلتَّارِيخْ آثَارْ اتْكَلَّمْ
لاَزَمْ مَا ايْعَلَّمْ بَالصُّوتْ
أَنَّ الْعِيشَة حَقّْ امْلَزَّمْ
اعْلَى اللِّي فَعْنَاقُو الْعْبَادْ
وَ الْكَرَامَة فِيهَا أَمْرْ مْحَتَّمْ
صَوْنْ الْحُرْمَة ابْلَا اسْتِعْبَادْ
و اللِّي خَانْ الْعَهْدْ يَغْرَمْ
اُو لاَزَمْ يَلْقَى الْحْسَابْ
حِيتْ الْرَّاعِي مَا يَظْلَمْ