تّمحى ما تبقاش (قصيدة زجلية)

تّمحى ما تبقاش (قصيدة زجلية)

بقلم: د. عبد القادر الدحمني

هادْ الْكْلامْ هديّة.. لمّالين الذوق
ولا اللّي في قلوبهم جمرة حارّة من الشوق

تّمحى ما تبقاش
°°°°°°°°°°°°°

ياك النفس بغات تفوّج وتمرح
ياك بغات تْسلطنْ وتسرحْ
يضرب فيها الضو
باش تّنفخ وتَفْشَح
مرّة تدير راسْها
مريضة ماهِيّاشْ
ومرّة شبعانة ما خصّاش

°°°°°°°°°°°°°
شحال تدور وتحوّم
شحال تخطّط وتروّم
وتفلسف عليك وتهوّم
تعاند وتزايد ما تعياش
تقول جمرة من نار
كافرة ما تطفاش

°°°°°°°°°°°°°
تّمحى ما تبقاش
دير الصواب غطا
والصبر الدايم فراش
دير الصدق دفوع
ديرو صفا من الاغشاش
الصدق نية ودوام
الصدق تَلزمْ التّحناش

°°°°°°°°°°°°°

تّمحى ما تبقاش
حيّد نفسك من الحساب
واقصد مولاك وحدو تلقاه
كاين اللي يشوف ما جاب معاه
وكاين اللي يشوف ما عطاه الله
وكاين اللي ما يشوف غير الله
راني معاك داوي..ما تسهاش

°°°°°°°°°°°°°

الفايدة تهز معانا الحمل ماتخوّاش
الفايدة تصيّد بقوام الطلبة
وتصفّي نيتك من العتبة
الرْمى حال ماشي غي تنياش

°°°°°°°°°°°°°

تّمحى ما تبقاش
شكون جا بثمرة القلب
شكون عطا صداق الدرب
حيّد عبارو وريّب اسوارو
عرّا على ذراع الخدمة
واحفر بالرشمة
وتعامل مع الخوت بالرحمة
بانت انوارو
وظهّر الله اسرارو
الطريق سهلها مولانا
ولّات كلها تفياش

°°°°°°°°°°°°°

تّمحى ما تبقاش
واهلي! شحال قبلك زربو
وحسبوها سمعة وتطناش
شحال قبلك ركبو وزهاو
استحلاو التفضيل والتشياش
ونساو الطريق طويلة
رْكَابْهَا تروم الفْنا وتعرف حدك
ما تنسب لنفسك تحواش

°°°°°°°°°°°°°

تّمحى ما تبقاش
جدد النية صباح وعشية
وقل يا الكريم كمّل فضلك عليّ
اصلح احوالي وسدد اقوالي
وكحّل بنور بهاك عينيّ
الجماعة بحر
يا الطامع في الصيد
ادخل لداخل واشْرِ
اسْخَ بالثمن ولا تسوّل وقتاش

°°°°°°°°°°°°°

عنداك تسها وتبقى مشموت
تلهى فجلايلك
ويفوت عليك الفوت
شي عينو على الكنز
وشي كفاه الحوت
واربط حبل النجا ما تنساش
النجا أدب وصْوابْ
النجا تشوفْ نفسك ترابْ
واقف بالرْجا عند البابْ
خايفْ من المزمّم في الكْتابْ
خايف من عوايدك ما تبراشْ

°°°°°°°°°°°°°

تّمحى ما تبقاش
مشى عليك الحنين
وفجعتو في القلب حزينة
مشى وأنت بعدْ ما بريتْ
من شلّا خْصايل مشينة
فازو ناس وعلّاو السَّاس
وأنت غارقْ في هْتوفك
شاطن نفسك وسواس
القافلة غابت؛ بْكُورْها عْوينة
ونفسك حارنة جافلة، ثخينة
وانت مسيوقْ مع قطيع الاكباش
متبّع الخوا
وتعبد الهوى ما تعياش

°°°°°°°°°°°°°

مزينو بعطية
سبحانو مكمل عطاه
صحبة وجماعة ترفع لْواه
صحبة في جماعة يا القاصد مولاه
تجمع الشمل
ويزهق الظلم ويترفع بلاهْ

°°°°°°°°°°°°°

وصلاتي دايمة ما تسالي
على مول الجاه العالي
سيدنا محمد الشفيع
لكل مضيوم بحالي
وخا نفسي متسواش
عندي تمّا حبيب
مفكرني ما ينساش