الله عليك يالمسكين ( قصيدة زجلية )
محمد فاضيلي
الله عليك يا لمسكين
جاك الهم
في اليوم الزين
وغرقت فيه
حتى لوذنين
العيد فرحتوفرحتين
وانت بالصبر
ديما مسلح
باغي تفرح
تضحك وتمرح
مع لولاد والوالدين
ولاهل ولحباب
كاملين
لكن كلشي عليك
ينفخ ويتنفخ
يطمع في الرزق
ولقلب لحنين
ما عرفوا
بلي وجهك
يبس وخجل
اغتم وتوسخ
باش يجمع لو
من كثرة التعب
دراهم وقرشين
ينفعوا في
اليوم لحزين
لولاد والزوجة
حقهم
في كبش سمين
قرونو غلاظ وملويين
وانتاي غير مسكين
قهرك الزمان
وغُلْب الحين
الشناق عليك يتحلف
يتشكى
من كثر ما عَلّف
وباغي منك
يتغنى ويترفح
ويتشوف
للربح الزين
مول لماعن
يخزن ويطرف
ومول الفاخر
عليك يتحلف
والعطار
يطحن ويغلف
مول لحوايج
ما يرحم
ولا يتعفف
ومول النقل
جاتو الوجبة
باش يخلص
الضريبة والتأمين
والجزار
ما يذبح ويصلخ
حتى يسب
وعليك يتنفخ
وينزع منك طرف سمين
وانتاي غير مسكين
باغي تفرح
وتعيش وتمرح
تشوي وتحمر
وتطبخ
وتنسى الضيم
وهم الحين
الله يتولاك
أيا لمسكين
ويرزقك من فضلو
رزق سمين
والأجر والكوثر
وثواب الصبر
وينجيك من هم السلف
وغم الدين
ليك الله يا لمسكين