هاد لحديد صدمنا(قصيدة زجلية)
هاد لحديد صدمنا (قصيدة زجلية)/ عبد الله الانصاري
هاد لحديد صدمنا(قصيدة زجلية)
بقلم : عبد الله الانصاري
ياربي تشوف من حالنا لحديد راه شطن بالنا
صدمنا وضيع لينا مالنا خلا عا الحسرة وراه
راه خلا دارنا ودوارنا ضعنا في شحال من جيرانا
وتحطمت احلام شبابنا والقلب عالم بيه غيرالله
حتى دولة ما بحالنا اش هاد الشي اللي صابنا
مكتوب ولا مغيب بالنا عيبنا هذا واشنو دواه
لميما تخبط في جنابها بحرا كانت مع حبابها
خبارهم شعلت عذابها كالو ليها الباقي الله
ضاعو شيوخنا وشبابنا وتيتمو شحال ولادنا
الكسايد كانت هي سبابنا هاد الحال ما رضيناه
الفرحة هجرت من بوابنا رجعت غمة وفقدنا صوابنا
تقهرنا كثير وتلف حسابنا راحنا مزاوكين في الله
لازم نرضاو بمكتابنا لازم نغيرو من عنادنا
الحياة امانة في عناقنا والصابر ربي معاه
لازم نصلحو طرقانا لازم نرفعو من شانا
تزول الفرقة ولمغانا والباقي ديال الله